30 URTEZ TXATXILIPURDI EGITEN
Txatxilipurdi eginda, halaxe nahi dugu gure ingurua, gure mundua aldatu. Horretan dihardugu azken 30 urte hauetan. Askotan egin dugu igeri izokinen antzera, korrontearen aurka bidea irekiz eta haur, nerabe zein familiekin batera, mundua ulertzeko moduak asmatuz eta gure buruak ere, ber asmatuz.
Hiru hamarkada hauetan aisialdi hezitzaile euskalduna izan dugu ipar eta gozamena ardatz. Ibilbide oparo hau Arrasateko herritarrekin eta Debagoiendarrekin ospatzeko asmoz, azaroaren 14an beste behin, kaleak hartuko ditugu Txatxilipurdi erraldoi bat eginez. Horretarako, kalejira koloretsua eta ekitaldia antolatu ditugu.
Kale-jira 18.00etan hasiko da Sebero Altube plazatik eta ostean, ekitaldia egingo dugu Kulturolako aterpean. Kale-jira alaia eta bizia izango da, osteko ekitaldia berriz, formalagoa.
Ekitaldian, 30 urte hauetan Txatxilitar izandako hainbat pertsonen bizipenak jasotzen dituen dokumental labur bat eskainiko da, baita Txatxilipurdiren marka berria aurkeztu ere.
Txatxilipurdiren parte izan zareten kide guztiei eskerrik asko, bertan elkar ikustea espero dugu.
Txatxilipurdi elkartea
