Txatxilipurdik, Besaide M.E, Leintz Eskola Kirola, Sustraibarri eta Garaion NaturArteanekin batera HURBIL GAITEZEN NATURARA lemarekin maiatzak 13,14,15 astebururako egitarau berezia antolatu dugu.
Ikerketek eta berezko esperientzia pertsonalek erakusten dute gaur egungo haurrek eta familiek natura behar dutela. Gero eta kontaktu txikiagoa eta azalekoagoa dugu naturarekin eta joera honek eragin kaltegarriak ditu gure haurren eta familiengan. Natura ordezkorik ez duen osasun, ongizate, ikasketa eta sormen iturri agorrezina da. Interakzio zuzena funtsezkoa da zentzumenen eta adimenaren garapenerako; baita garapen sozial eta afektibitatearentzako ere.
Honetaz jabetuta eta gai honekiko Txatxilipurdi elkarteak azken urteotan hartutako konpromisoari jarraiki (besteak beste, Heike Freireren “Educar en verde” liburua euskarara itzuli eta argitaratu genuen 2015ean, BERDEAN HEZI) Arrasate eta inguruko elkarte ezberdinekin haurrak zein helduak naturara hurbiltzeko HURBIL GAITEZEN NATURARA egitarau zabala osatu dugu.
Maiatzak 13 ostiralean hasita 3 eguneko egitarau honetan publiko anitzarengana iritsi asmo duen hurrengo ekintzak antolatu ditugu:
- Maiatzak 13 ostirala 18:00_20:00: Txatxilipurdi Elkartearen eskutik Arrasateko Monterron Parkean asteburuari hasiera emango diogu, bertan HAUR ETA HELDUENTZAKO JOLASAK eta solasaldi bat egongo da, gozamenetik naturara hurbiltzeko asmoz.
- Maiatzak 14 larunbata:
- 9:30_14:00: Besaide M.E eta Leintz Eskola Kirola-ren eskutik GURE INGURUAZ GOZATZEKO IBILALDIA izango dugu. Monterronen hasi, Mehatz Errekatik pasa eta San Baleixon hamaiketako egin eta jolastu ondoren, Monterronera itzuliko gara, gure inguru hurbilean ditugun altxorrez gozatzeko gogoa pizturik.
- 11:30_13:30: Garaion NaturArtean-en eskutik Musakolako San Antolin plazan NATURARTEAN SORMEN TAILERRA izango dugu, elementu naturalak baliatuz Musakolako astoa sortuko dugu.
- Maiatzak 15 igandea 17:00_18:30:
- Sustraibarriren eskutik emozioei tarte bat egin eta naturarekin harremanetan Monterronen “TAILER EMOZIONALA TXAKURREKIN” saioa izango dugu.
Egitarau honek haur, gaztetxo zein helduen beharrak asetzea du helburu. Behar anitzak dira gaur egun ditugunak eta horiek naturarekin harremanetan asetzeko egitaraua osatu dugu; jolasa, hausnarketa, gozamena, sormena, emozioak … denak uztartzeko parada izango dugu asteburu osoan zehar. Aurretik aipatu bezala, natura pertsonon garapen integralerako iturri agortezina delako eta berau zaindu eta maitatzen jarraitzeaz gain, beronekin dugun harremana berreskuratu behar dugulako.
