Eguraldi eguzkitsua ikustean , uda, oporrak, gozamena… datorkigu burura. Eta nola ez, jolasa, jostailuak eta lagun artean une atseginak pasatzeko gogoa.
Oraingoan, Gabon garaian egiten dugun bezala, udarako jostailuak trukatzea proposatu nahi dugu. Etxean dauzkagun jostailuei begirada bat bota eta erabiltzen ez ditugunak beste batzuengatik trukatzeko aukera luzatu nahi dugu. Edonolako jostailuak trukatu ahalko dira baina uda gerturatzen ari dela eta, Gabonetan gogoratzen ez garen jostailu mota horiek ere trukatzea proposatu nahi dugu. Hondartzan edo igerilekuetan erabili izan ditugun jostailu horiek: kuboak, palak, eskuare, kometak, urpean jolasteko jostailuak, ureztontziak , hondarretan jolasteko jostailuak, disko hegalariak…
Jostailuak biltzeko egun bakarra izango dugu oraingoan, beraz, argi ibiltzea komeni da. Maiatzaren 21ean, ostiral arratsaldean, Arrasateko gune ezberdinetatik pasatuko da Txatxilipurdiko furgoneta jostailuak biltzen:
–Â Â Â Â Â Â Â Â Â 16:30-17:30ak bitartean Sebero Altube plazan jasoko dira.
–Â Â Â Â Â Â Â Â Â 17:45-18:45ak bitartean Santamarinako ludoteka aurrean.
–         19:00-20:00ak bitartean Arimazubi plazan.
Jostailuen truke, txartelak banatuko ditugu, zenbat jostailu hainbeste txartel.
Txartel horiekin, Ekainaren 4an, ostirala, jasotako jostailuen artean beste batzuk aukeratzeko beta egongo da.
Indarkeria sustatzen dituzten jostailuak ez dira onartuko ez eta irudi sinbolikoa dutenak ere, tartean pistolak, izan uretakoak edo ez. Bestalde, sexu bereizketa egiten duten jostailuak ere ez dira onartuko. Eta nola ez, jostailuak egoera onean eta osorik egon beharko dira.
Ekainaren 4an Monterrongo parkean, jasotako jostailuak ikusgai jarriko ditugu eta trukea aurrera eramango dugu. Bertan, jokoak azaltzeko  eta elkarrekin jolasteko tartea hartuko dugu. 18:00etatik 20:00etara bitartean egongo gara eta segurtasun neurriak bermatuz, nahi duen orok parte hartzeko aukera izango du.
Segurtasun neurriak betetzea norbere ardurapean egongo da, nahiz eta Txatxilipurdik hidrogela eskaini eta materiala desinfektatua eramango duen.
