21 urte beteko ditu aurten Txatxilipurdi Elkartetik Gabonak aurretik antolatzen dugun Jostailu Truke Merkatuak.
Orain arte egindakoaren bidetik, jostailuak jasotzeari azaroak 16an ekingo dio.
Osorik eta egoera onean egon beharko dira, parte hartuko duen edonori jasotzea gustatuko litzaiokeen bezala.
Jasoketa egun eta guneak hauek izango dira:
- Azaroak 16 Arimazubi plazan.
- Azaroak 21 Arimazubi plazan.
- Azaroak 22 Usaetxe plazan.
- Azaroak 28 Biteri plazan.
- Azaroak 29 Biteri plazan.
- Azaroak 30 Biteri plazan.
- Abenduak 2 eta 3 Santamarinako ludotekan.
- Abenduak 10 Euskal herria plazan
Ordutegiari dagokionez, aste barruan 17:00-18:30 bitartean jasoko dira eta zapatuetan berriz, 12:00-13:30 bitartean.
Ordutegi hauetan jostailuak eraman ezin dituztenentzat, eguerdiko 12:00-13:30 bitartean Txatxilipurdiko bulegora eramateko aukera egongo da jasoketa egunetan.
Txatxilipurdiko baloreei jarraiki, indarkeria sustatzen duten jostailuak ez dira onartuak izango ez eta jarrera sexista erakusten dutenak ere. Berdintasunari eta tratu onei, beste hainbat baloreen artean, garrantzi handia ematen baitiegu.
Jostailu guztiek balio berdina izango dute eta hauen truke txartelak banatuko dira jasoketa puntuetan. Zenbat jostailu hainbat txartel!
Jasotako txartelekin, TRUKE EGUNEAN ( ABENDUAK 14an ) bildu diren jostailu guztien artean aukeratzeko tartea egongo da.
Parte hartzaile bakoitzak.
- Lehen orduan ( 11:30-12:30 bitartean) Koloredun bi txartelen truke bi jostailu aukeratu ditzake.
- Bigarren orduan aldiz ( 12:30-13:30 bitartean) zuri-beltzeko (gainontzeko txartelen) truke dagozkion jostailuak har ditzake.
Modu honetan parte hartzaile guztiek izango dute aukera zabala lehen bi jostailuak aukeratzeko.
Abenduaren 14an, aipatu bezala, truke eguna ospatuko da 11:30-13:30 bitartean Biteri plazan.
Bertan, txartelen truke jostailuak jasotzeaz gain, berrerabilpena sustatuz, Gabonetako apaingarri eta jostailu ezberdinak sortzeko tailerra egongo da.
Gabon garaian jostailuak erosi beharrean trukatuz ezberdinak lortzeko aukera paregabea da.
Etxean erabiltzen ez diren jostailuak beste batzuengatik trukatu eta egin jolas!
Familian, lagun artean, bakarka… parte hartu eta gozatu!
