Txatxilipurdi Elkartetik duela 19 urte ekin zion proiektuari jarraipena eman nahian, azaroa-abendua bitartean “ Jostailu Truke Merkatua” antolatuko dugu.
Orain arte egindakoaren bidetik, jostailuak jasotzeari azaroko 3. astean ekingo diogu.
Jostailuak, osorik eta egoera onean egon beharko dira, parte hartuko duen edonori jasotzea gustatuko litzaiokeen bezala.
Jasoketa egun eta guneak hauek izango dira:
– Azaroak 17 eta 18an Santamarinako ludotekan.
– Azaroak 19an Legarra plazan.
– Azaroak 24an Arimazuri plazan.
– Azaroak 25ean Usaetxe plazan.
– Azaroak 26an Arimazuri plazan.
– Abenduak 1ean Herriko plazan.
– Abenduak 2 eta 3an Biteri plazan.
Ordutegiari dagokionez, eguenetan eta barikuetan 17:00-18:30 bitartean jasoko dira eta zapatuetan berriz, 12:00-13:30 bitartean.
Ordutegi hauetan jostailuak bertaratu ezin dituztenentzat, eguerdiko 12:00-13:30 bitartean Txatxilipurdiko bulegora eramateko aukera egongo da jasotze egunetan.
Txatxilipurdiko helburuei jarraiki, indarkeria sustatzen duten jostailuak ez dira onartuak izango ez eta jarrera sexista erakusten dutenak ere. Berdintasunari eta tratu onei, beste hainbat baloreen artean, garrantzi handia ematen baitiegu.
Jostailu guztiek balio berdina izango dute eta hauen truke txartelak banatuko dira jasotze puntuetan. Zenbat jostailu hainbat txartel.
Jasotako txartel hauekin, truke egunean ( abenduak 17an ) bildu diren jostailu guztien artean aukeratzeko tartea egongo da. Parte hartzaile bakoitzak lehen orduan ( 11:30-12:30 bitartean) bi txartelen truke bi jostailu aukeratu ditzake. Bigarren orduan aldiz ( 12:30-13:30 bitartean) gainontzeko txartel guztien truke dagozkion jostailuak har ditzake. Modu honetan parte hartzaile guztiek izango dute aukera zabala lehen bi jostailuak aukeratzeko.
Abenduak 17an, aipatu bezala, truke eguna ospatuko da 11:30-13:30 bitartean Biteri plazan.
Bertan, txartelen truke jostailuak jasotzeaz gain, berrerabilpena sustatuz, jostailuak sortzeko tailerra egongo da.
Gabon garaian jostailuak erosi beharrean trukatuz ezberdinak lortzeko aukera paregabea da.
Etxean erabiltzen ez diren jostailuak beste batzuengatik trukatu eta egin jolas!
Familian, lagun artean, bakarka… parte hartu eta gozatu!
