Aurtengo Jostailu Truke Merkatuan 120 jostailu batu ditugu, iaz baino gutxiago, baina jostailu pila bat hala ere.
Urtero bezala, mota guztietako jostailuak egon dira eta trukera etorri direnak gustura gelditu direlakoan gaude.
Aurtengoan trukea Biteri plazan egin dugu, Ibai Artekoen ekintzekin bateratu nahian eta gerturatzen zirenei aukera ezberdinak eskaini asmoz.
Trukean jaso dituzten jostailuak 64 izan dira eta azken ordu erdian jostailurik ekarri ez dutenei ere aukera eman diegu bakoitzak jostailu bat hartzeko, azken finean jostailuen berrerabilpena bultzatu nahi baitugu, eta beste 32 jostailu oparitu ditugu. Soberan gelditu direnak beharra dutenen artean banatzeko emango ditugu eta datorren urtera arte agurtuko dugu egitasmoa.
Trukeaz gain, larunbatean, jostailuak sortzeko tailer bat ere jarri genuen. Jostailu ezberdinen ereduak izan zituzten aukeran egin ahal izateko eta beste zerbait asmatu nahi zuenari baliabideak eskaintzen saiatu ginen.
Hasiera batean trukeak arrakasta gehiago izan zuen arren, bigarren orduan jostailuak sortzera jende dezente gerturatu zen.
