Aurtengo Txatxilipurdiko udaleku itxietan be, tril ingou!
Txatxilipurdi elkartean, aisialdi hezitzaile euskalduna lantzen dugu eta bizitzarako behar ditugun balore eta gaitasunak garatzen laguntzen dugu, hala nola, euskaltzaletasuna, parte hartzea, autonomia, naturarekin harremana, aniztasuna eta feminismoa.
Gure udaleku itxiek ere balore hauetatik edaten dute, betiere nerabeak eta gozamena oinarri izanik.
Zaintza erdigunean jarriz, pertsonen ahalduntzean, garapen pertsonalean eta tratu onetan oinarritutako udalekuak antolatzen ditugu, talde harreman zaindu baten bitartez, nahiei eta ametsei ere leku eginez.
Horrez gain, uda garaian aisiaz gozatzeko, egunerokotasunetik irtenda esperientzia berriak bizitzeko eta harreman berriak egiteko bitarteko aproposak dira.
Aurten ere, azken urteetan zehar egin dugun bezala, Arrasatetik abiatuta, Euskal Herriko aurre-nerabe eta nerabeei udaldi magiko eta ahaztezin bat eskaini nahi diegu.
Euskaraz, naturaz, sormenaz, bizikidetzaz, elkartasunaz eta talde lanaz bustitako oporraldi paregabeak merezi dituztelako.
Zarena zarela, gozamena oinarri, nahiei eta ametsei elkarrekin leku egingo diegu! Ingou tril Txatxilipurdiko udalekuetan?
UDALEKU ITXIEN DESKRIBAPENA
2025eko udaleku itxiak 9 eta 18 urte bitarteko nerabeei daude zuzenduta eta hiru eskaintza antolatu ditugu.
Alde batetik, ekainaren 29tik uztailaren 6ra bitarte, GaraiOn-en (Ozaeta, Araba) izango gara. Zortzi eguneko kanpaldia antolatu dugu.
Bi adin tarte ezberdinek osatuko dute udaleku itxi hau eta adin tarte bakoitzak bere herrixka propioa izango du GaraiOn-en (lo leku, elkargune eta jolas eremu propioaz osatua). Udalekuak abenturaz beteta eta giro goxoan pasatzea nahi dugu. Elkar zaintza izango da ardatz garrantzitsuetako bat eta udalekuetan parte hartuko dugun kideon hitza kontuan izanik adostuko dira ekintzak.
Adinaren arabera izendatuko ditugun taldeak hauek dira:
- AIZKOMENDI HERRIXKA (LH 4, 5 eta 6 mailak, 9-12 urte bitartekoak (2013-2014-2015 urteetan jaiotakoak) 350€ / 30 plaza
- GEBARA HERRIXKA (DBH 1eta 2 mailak, 12-14 urte bitartekoak (2011 eta 2012 urteetan jaiotakoak) 350€ / 30 plaza
Bestetik, Kosta ala Kosta udaleku ibiltaria izango dugu, uztailaren 6tik 13ra. Abentura hau Arrasaten hasi eta Gipuzkoako mendiez disfrutatuz, Mutrikuko kostara iritsiko gara. Hemen ere zaintza izango da ardatz nagusia eta baita naturaz gozatzeko aukera aparta ere.
Adin honetako taldea honakoa da:
- KOSTA ALA KOSTA (DBH 3-4 + BATXI) , 14-18 urte bitartekoak ( 2007, 2008, 2009 eta 2010 urteetan jaiotakoak) 350€ / 20 plaza
PREZIO GUZTIETAN APLIKAGARRIA:
- AED-ko bazkide izateagatik %5 deskontua.
- Familia ugaria %5 deskontua
- Biak izanez gero %10 deskontua
Beraz, diru sarrera egitean, deskontuak kontuan izanik egin beharko da (ordainketa gaztearen izenean egin beharko da). Kasu hauetan agiriak aurkeztu beharko dira.
IZEN EMATEA
Txatxilipurdiko udalekuetan izena emateko epea otsailaren 11n irekiko da eta apirilaren 13an bukatuko da. Aurrez-aurre zein on-line bidez jasoko dira izen emateak:
- Online hemen
- Otsailaren 11n zabalduko den QR kode baten bitartez.
- Bulegoan: Nafarroa etorbidea 23, 1.solairua. Astelehenetik ostegunera, 9:30-13:30 / 15:00-17:00 Telf. 943795446
Informazio puntuak ere egongo dira, edozein zalantza argitzeko asmoz:
- Otsailak 20, Biteri plazan. 17:00-18:30
- Otsailak 21, Arimazubi plazan. 17:00-18:30
- Otsailak 27, Kurtzetxiki plazan. 17:00-18:30
- Otsailak 28, Institutu aurrean. 17:00-18:30
ARRASATEKO UDALEKO DIRU LAGUNTZAK
ARRASATEKO UDALAK AISIALDI ETA KIROL PROGRAMETAN HAURREN PARTE HARTZEA SUSTATZEKO DIRULAGUNTZAK ATERAKO DITU.
Informazio zehatzagoa BAZen, Gazte bulegoan edota Txatxilipurdin.
